好忙嘅牛年新年假期

由歲末年廿八前忙到昨日！　年廿八周氏宗親團年飯，喺二家姐家團聚。傳統中式菜餚之外，仲有三文魚刺身同雪花西冷牛扒！正~~但之前就準備咗好幾日，真係做到趴喺度！

年廿九，輪到自己團年，之不過，皇后食過雞腳，要再嚟食，於是又叫埋大家姐，再加原本話唔嚟之後又嚟嘅菠蘿油王子 + 王妃，又一大堆人。不幸嘅係：買唔到馬蹄打蝦棗，又買唔到花蟹整凍蟹，好彩有一斤螄蚶頂住！wow~~ 今次超成功呀！已充份掌握到灼螄蚶嘅竅門！

年卅，循例去姐夫父親家團年；各戶長者，只剩佢一主仍健在。年初一，又去番佢度食晏，南乳齋，我本身鍾意南乳，但都食啦~~ 太遲先發覺有瑤柱白粥！

初一下午就去咗睇波兒，好好睇，啱晒咁有童真嘅我！夜晚食埋意粉屋先打道回府。

初二，唔使開年，但家姐下令睇早場！！家有囍事2009！網上購咗票先，睇完Pokka開年飯，幾豪呀……..跟住去探要開工嘅朋友，擄掠了火柴人同史諾比產品，就回我家煎糕！除咗年糕，清晒我個倉！跟住就仆入上水探住院嘅朋友！感天主！佢勁好精神！繼續去返王子家回禮！食晒佢屋企嘅嘢，再玩咗啤牌……當然又係我勁飲啦！

初三最甘呀~~~

海洋公園！玩咗我咁多年都玩唔到嘅滑浪飛船同越礦飛車，跟住勁跑去睇冰上歷險，搞到我家陣腳仔仲痠痛中~~ N比我整喊咗兩鑊，一鑊玩，一鑊罰…… 結果我仲攰過佢！玩到七點幾先走，去MK1陪買手機，繼續擄掠！波兒波子棋呀！！YEAH！！！Then去咗Pizza Hut晚餐，等位時竟然話要個半鐘！好彩，我哋有先遣步隊去等位，我哋買完嘢啱啱好~~

係咁食係咁玩，攰不特止，肥添啦~~

又增咗磅，幾多？咪玩啦！我點會講？

 

錯就要認~~

過年前發生的『小』事一宗。

 

說小，皆因是小兒科，然而，處理不當則有所遺害。

 

話說有天我在家，N放學回來老纏我。還是G醒目，問她是否不開心？我便捉了她坐下傾心事。小妮子兩句就流眼水…..訴說同學仔誣告她鬧人。由於她表達素來有問題，我又發現她中途改口，於是找了班主任問。班主任解釋事件因放學，N又要去厠所，因此尚未解決。

 

我安撫了她，讓她盡訴委屈，信任她。但我提醒她：若事件水落石出後，老師認為她有錯，她仍是要道歉或接受懲罰。

 

最後，事件是這樣的：

 

放學前的最後一課是導修課，那天正在改正考試卷。N素來對聲音敏感，當時大部份同學已準備放學，於是你一言我一語的，聲浪已達N不能忍受的水平。她旁邊的同學突然向她身後隔一個位的同學，爆出了一句：『死鬼！』只有她聽到。真的是說時遲那時快，她就大大聲答：『死八婆！』(平時反應那有這麼快的？)

 

全場 =口=

 

全部同學梗係『啊』佢啦！同學要告她，她便哭了。老師未哄完她，便因為已經打鐘，而要放學了。集隊和祈禱完，她又要去洗手間，所以未能處理。

 

翌日，她當然要道歉啦，但仍不服氣，因為她心想：明明是別人喧嘩呀！

 

發生事時我post了上Facebook，大部份人都幫她。心水清如我和大家姐，當然知內有乾坤。

 

如N那樣自我的小朋友，很多時會自己編故仔，家長別因過份疼惜，而偏幫子女。當然要信任，但也要讓小朋友知道，撒謊後仍是要面對事件的。

 

水落石出後，我仍找了不同的機會，向她反覆提示當日的舉動是錯誤的。最重要的是：為母的我，知道她其實不知『死八婆』是鬧人的句語。

 

現在她仍未聽入耳架！以她的習性，大槪要再多講數次至數週，她才會接納自己原來做錯了。(唉……自閉傾向的小朋友，常見的故執行為。)

 

另外，醫生見她『進步』如此，已暫免她定期覆診，兩年內若沒有任何壞的變化，她的檔案便結了！

 

感謝天主！

崖上的波兒粵語主題曲由今年只得6歲的小妹妹主唱

崖上的波兒 – 粵語主題曲
填詞：謝安琪
主唱：何鎂沂

波兒，波兒，波兒，魚兒小寶貝
在深藍大海裏 搖擺著尾巴
波兒、波兒、波兒，肚子脹卜卜
脹卜卜 哈哈笑 整天在笑

跳前跳左 轉個圈
一對奇妙腳仔 開心通處跑
牽著你走 揮一揮手
真有趣這小手 牽手來喲

只想一起 傻傻地跳，教我的心舞動如歌
BooLu BooLu 親親
BooLu BooLu 擁抱
是我心裹最愛的你
紅著臉囉

波兒，波兒，波兒，魚兒小寶貝
在這懸崖邊找到 向海洋小屋
波兒、波兒、波兒，肚子脹卜卜
脹卜卜 哈哈笑 整天在笑

 

schedule錯亂的原因水落石出

原來我部手機曾經在過關時跳過夏令時間, 所以個schedule亂晒咗~~~~~

今日真係……

今日係覆診日，點知……

 

我可能真係有早期癡呆，言語治療明明係十一點半，鬼整佢我手機內記低十二點半！……即係無得睇囉~~~

 

而家改咗年初四定五，唉……

 

J姐姐約我食完煲仔飯先返入大埔聽講座，點知……

 

我訂咗件褸去拎完，就攰意全出，諗住放棄煲仔，返閨溫女啦，主要係想同周公嘅後人短聚吓咁啦，點知……

 

小睡前梗係收收依貓，同人聯絡聯絡咁，某網路朋友真係，頂佢唔順，侮辱人唔使本！實實在在告訴咗佢：對佢半點興趣都冇呀！世界唔係你諗咁，你以為自己諗嘅一定啱？唔啱你心意嘅事或人，你就有權任意每辱嗎？拜託！

 

瞓到五點幾六點，有人搵我，講完兩句，就繼續瞓，跟住團長搵，但我未清醒，冇法同佢傾，同佢講瞓醒先搵佢，但，到家陣都未搵，我決定明天先搵，因為準備去再瞓過！

 

N嚟叫醒我食飯……吓？六點幾？打電話通知大姐：我決定繼續瞓，唔入大埔！

 

……起身一望，成間屋黑晒，究竟幾多點？全屋人瞓晒嘅？G起身幫我煮嘢食，原來未夠九點！一路食一路做件平日好少做嘅事：睇電視！嘻！

 

繼續去瞓……

得的多！

又去咗深圳小肥羊，小牛請客；而我竟然忘記帶給她貢品！她海量，我和姐照去擦餐懵！

 

吃不完，唯有打包：半斤豆苗、四兩雞腿菇，另加小肥羊餐紙兩張。環保兼省錢，用我心愛的古董大口仔環保袋袋走。去到月台，發現袋不見了！

 

思前想後，大槪是在手扶電梯脫外套時丟失的……駟馬都難追啦~~

 

去到羅湖橋，有人蹲在一旁，咱們仨加起來有八，跑去看有沒有要幫忙的。那姨姨原來哮喘發作。保安叫我們幫忙攙扶她去到中央一張椅子。後來才知：姨姨蹲著之處，仍是華界，他們過不得，唯有叫我們幫幫忙。

 

有好心人送了哮喘噴劑給姨姨頂著檔，另外有位中醫師路過助她推拿了一會，大家後來才發現我們是不認識的，嘖嘖稱奇！醫師問我們為何那麼好心？我幾想答因為信天主！我們總共陪了那位姨姨差不多半小時救護車才到。

 

入境處職員說，像我們這樣熱心的人，現今已死得七七八八！唏！仲有二二三三，唔使怕！

 

小牛說也許是整定我丟失了菜，才會照顧到姨姨，這樣一來，我們總共救了一個以上的人：M姨姨，還有，拾到我袋菜的人，可能不只一人吃，可能是一家幾口吃，仲有袋用添~~

 

講得真高貴！==”

Polite? Impolite?

你們有試過在MSN or YM offline而沒有通知街坊嗎？

 

不只一次, 有人投訴我, 開咗 chat box沒有通知就off咗, 話我沒有禮貎沒有教養!

如果係咁, 我全部朋友都可以釘牌!

 

我的觀念是, 如果真的傾緊而斷線走咗, 我必定無禮兼無理, 但攤超過5分鐘以上, 你唔再傾我估都唔使通知啦!

 

即時通訊系統, 是你即時有訊咪通囉, 無訊, 咪斷囉! 何況, 我在公司用56k, 仲係偷雞上msn之嘛, 無嘢就會斷線, 尤其是我主要做嘢, 都不是在office嘅!

 

最特別之處: 只有外籍人事有呢個投訴, 反而黃種朋友從未有呢啲嘢聽過喎, 唔通真係文化差異????  

小小小近況

終於刴咗Tagged嘅 account，乾手淨腳。

 

黑人終於不纏我了！因為他已找到另一位，並且已訂埋婚。好似十一月尾定十二月頭佢仲追緊我問我做乜唔睬佢？死都話要見我，嗖一聲佢就post咗一張攬女相出嚟，話係佢未婚妻！哈！男人，要變就變！好彩，我從來都係拒絕佢，仲係真嗰隻而非流嘅，唔係就真係玩死自己。

佢仲問我會唔會介意，又猛讚我nice。唓，你都唔係我杯茶，mind乜鬼？

 

朋友在Facebook改咗姓，原來佢又搵到個外國人喎，又係訂咗婚，不過當然唔係黑人啦！又係internet 識嘅。希望今舖佢真係搵啱人啦，經歷咁多舖比人跣，朋友，願天主祝福你今次真的結良緣！

再次呻 msn spaces 革新後無好嘢

真係好差呀~~~

因為佢改咗啲首頁呀同睇回應嘅版面, 搞到有人回應咗我我都唔知呀!!!!

阿Idiot大佬cm咗我成5日我都唔知道呀, 覺得自己好似好無禮咁!!!

 

而家好似惡循環咁!!!!

 

改版→感覺差→少上→上咗→唔多識用→感覺更差→更加少上→唔知有人回應→好嬲呀→感覺更加差上加差→好想媽叉→更加之更加之好唔想上→……………

妹記大排檔

 12月30號去咗金巴利街街市嘅妹記大排檔試食。慕名已久，終於可以親身體會。

 

 因為得兩丁人，只有小試，但最後都係眼闊肚窄。

 

 叫咗四個菜，首推忌廉汁野菌牛脷粒。好味！牛脷好軟熟，不是用粉『喇』的，食得出牛脷不同位置的不同軟韌度。咪睇佢細細兜，都好襟食吓。

 

薑汁芥蘭好普通，因為外籍朋友，叫咗豉椒炒蜆佢試，不過不失。比較特色係佢用個疑似盤嘅物體上菜，幾搞鬼！

 

佢哋撚手招牌小菜之一『黃金蝦』比較失望，較為油咗些少，濕濕哋；若炒乾身啲會更好。

 

飲啤酒梗係飲藍妹，難得外籍朋友同我口味一致！不過呢度好趣緻：係用碗飲嘅！後來發覺隻碗原來仲有名嘅：好似叫『戰鬥碗』定唔知乜，因為已經埋咗單，無緣拍低佢。啲碗係哈爾濱啤酒提供嘅！

 

小菜唔算貴，只係四十零五十零蚊，最貴先去到六十幾，羊腩煲除外。三五知己去去吹水都幾好，算乾淨。全單連酒水$325，仲係冇收花生同茶錢喎，算抵啦！

 

全個熟食中心晚上得佢一檔營業，必然無坐錯。