我的情人節就是這樣渡過的

T昨晚來電問我今晚是否有空，我答曰已約人，因為約了二姐收機。他說想見見我，我說中午吧，他有點猶豫，最後叫我離開二姐家時致電給他。我覺得呢要約人早一點嘛，我雖然是甚少慶祝情人節，但那麼特別的日子，也不是今天約明天吧！但，若你問我，我若非約了二姐，會去赴約嗎？答案是：不！因為我知他壓根兒沒有準備和我慶祝，無謂大眼瞪小眼的過一夜。

收了工便去二姐處，最後扑鎚吃壽司刺身拉麵，誰不知，我剛和二姐一家吃完晚飯，正準備去老麥申請媽咪咭時，他赫然在我們眼前！都好驚嚇啫，冇預料佢會喺嗰個位置出現。

二家姐話佢個樣好怪，因為佢又擺出嗰副好down嘅死樣。搞掂後二姐先回家，我搭巴士，問他有甚麼跟我說，他說只想見見我。有話怎麼不說？他的手不停的撥弄著口袋和胸口的拉鍊，我沒有好氣。飯氣攻心，要不是他跟在一旁我還可以眠一眠。他問我是不是不想見到他，我說不是，他問我做甚麼？我答沒甚麼，跟著找到個好機會叫他自己封一千蚊十蚊利是，等佢都感受吓我年年封通宵的滋味。一路跟我回家取零錢，問我找人替我換錢定自己去排隊？誰替我換？只很簡單答：朋友。

他回到家在背包中取出三排黑巧克力，說知我鐘意食，我謝過便放在枱上。他不說或不送還好，一送我又想起我所有的平靚貨給他帶走吃過精光了！有點肉赤。然後就走了。

*****************************************************************************************************

今日忘記帶辦公室鑰匙，比個舍監勁串：『吖，唔知點先可以令你記得帶鎖匙呢？……你都答唔出哩！……我呢度唔suppose借匙鎖比你格！』

很想對她爆粗，但，鬼叫自家忘了帶匙咩！= =! 之但係，那有一個人可以記得所有的事？我都好想話佢知我呢個係死症，冇得醫，只會越來越差！如果唔係咁啱同事都不在，真係唔使求佢呀！下次有機會都要串返佢兩咀先，仲要係我串咗佢仲要扮無知，等佢以為我無心之失，又唔可以發作至得。不過其實我邊有咁高招！等下庄同我報仇啦！我都擺唔到幾耐。

跟住約了今天來上課的青年和執事，便去集合地點等。之前同執事講笑叫佢帶花嚟，要三枝，否則唔好上堂，佢幾認真呀，帶咗條金莎，仲問我乜唔係要收入場費咩？勁感動呀！連隨約埋J出嚟情人節午餐啦梗係……我同J請客。沙田青年一路答唔上咀，但駭笑不已！我說，未見過這樣的PCW 哩，但別怕，弊公司只得我一個這樣騎的人，冇第二個格嘞！一路我哋互相有來有往，阿J 最後失手，講錯說話比我勁上位，以為是全餐飯的高潮，因為佢又將我同大姐的身份對掉，話：『我同你妹講呢….』未完我已回咀：『哼，你唔使去美國讀書嘞…..菲律賓混印度吓嘩，去到美國就有人幫我拉BANNER接你去賣格嘞！』配以我不屑的眼神，阿J 梗係知衰咗，點知執事那招看似明白比我們識穿，實情是全然唔知，慘成笑柄，佢仲要即席示範一錯再錯，最後不得不坦白從寬告訴我：『我不嬲都將你兩姊妹調轉撈亂格嘞！』阿執事，所以唔好扮醒。大家以眼水收場！

呀，係呀，J ，恭喜你可以以交換生身份去美國一個學期，讀萬卷書不如行萬里路，盡情享受這個學期嘞！

*****************************************************************************************************

晚上打電話比女，佢話睇緊電視喎，但跟手啲內容笑到我標眼水，唔該各位話我知究竟佢睇嘅係乜嘢節目：

女：媽咪，我睇緊電視呀！

我：係呀，睇緊乜呀？

女：黐孖根抵死

我：吓？？乜話？黐孖根抵死？

女：係呀，………..(聽唔到佢講乜)….個彩虹博士黐住咗喺本書處呀！

我：哦，睇緊彩虹博士呀……= =!

女：係呀，師奶真抵錫呀！

我：吓，師奶真抵鍚？係咪真係有呢個節目o架？

女：係呀！

我：XDDDDD  ->v<-